284

Otuz üçüncü maddesi mücazata dair olup icabı halinde ahkâmının tamamıyla mer’iyyü’l-icra tutulması iktiza eder.

Sekizinci Madde: Orman nizamnamesinin otuz dördüncü maddesi hükmünce ağaç kabuklarını soyanlar veyahut diğer suretle sakatlayanlara bunları kökünden kesmiş gibi mücazat olunur ise de ağaçlardan çıra çıkarmak ve reçine yani çam sakızı alınması içün ağaçları yaralamak ve katran yapılması içün özlü ağaçları devirmek ve reçineli yani çam sakızlı eşcarın tomurcuklarını koparmak taht-ı memnuiyete alınarak mütecasirleri hakkında orman nizamnamesi mucibince her halde mücazat olunacaktır.

Dokuzuncu Madde: Eşcar-ı kaime yani haliyle duran ağaçlar her ne cins olursa olsun kabuklarının çıkarılmasıçün ruhsat verilmemesi ve fakat bu makule kabukların alınacak ruhsat üzerine kendi kendine yere devrilerek ormanda haliyle kalmış ve bir parça mahalde ruhsatla kesilmiş ağaçlar kabuklarından düşürülmesi ve orman nizamnamesinin otuz altı ve otuz dokuz ve kırk ve kırk bir ve kırk iki ve kırk üçüncü maddeleri ahkâm-ı mündericesinin tamamıyla icra olunması iktiza edeceği gibi kırk yedinci ve elli ikinci maddeleri hükümleri dahi cari olacaktır.

Onuncu Madde: Miri ormanlarından kesilen ağaçlar ve saireden alınacak resme gelince ahali-i kuranın usulü üzere serbestçe keserek satmak içün şehir ve kasaba ve pazar yerlerine nakl ve tenzil edecekleri küçük kerestelerden öşür alınması icab edeceği gibi ahali-i merkumenin bu yolda kesecekleri küçük keresteler ticaret yolunda mahal-i ahare nakl olunmak üzere satılmağa mahsus ise bu makulelerin evvel emirde mukavelenameye rabtıyla ba‘dehu kat‘ ve nakline müsaade olunmasına ziyadesiyle itina ve dikkat edilmesi iktiza eder.

Fi 17 Şevval sene 29 ve 4 Teşrin-i Sani sene 91

( Orman )