305

Tamgalanmak lâzım geleceği gibi poliçe ve sair evrak-ı ticariye envaına fasl-ı rabide
beyan olunacağı vechile pul yapıştırılacaktır.

Sekizinci Madde: Matlub olan kıymetde bir varaka bulunamaz ise o kıymeti
ikmal edecek yani tahriri lâzım gelen senedin işbu nizamnameye merbut
tarife mucibince yazılacağı varakanın kıymet-i mahsusasını dolduracak
aded ve nisbetde evrak alınıp birinin üzerine sened tahrir olunarak zirine
işbu sened şu kadar aded varaka-i sahiha ilavesiyle yazıldı deyu asıl senede
şerh verilerek imza ve temhir edilecek ve ilave olunanlar dahi aña
rabt ile tamgalarının zirine «filan maddeye dair filan tarihli senede
merbutdur» ibaresi yazılıp senedi temhir ve ya imza edenler tarafından
ziri imza ve yahud temhir edilecektir.

Fasl-ı Sâlis

( Tamgalanması Lâzım Gelen Evraka Dairdir )

Dokuzuncu Madde: Hisseli olarak bâ-ferman-ı âli teşkil olunmuş ve olunacak
her nevi şirketlerin gerek muvakkat ve gerek katî hisse senedatıyla tahvilatının
mikdar-ı itibariyesi üzerine bir defalık olarak yüzde bir hesabıyla resm-i tamga
alınarak tamga etdirilecektir.

Dersaadet borsasında tedavül edecek ecnebi şirket ve istikraz senedat
ve tahvilatının kezalik mikdar-ı itibariyesi üzerine yüzde bir hesabıyla resm-i tamga
alınarak tamga etdirilecektir.

Onuncu Madde: Şirket hisselerinin resmi verilmiş olan senedat-ı
muvakkatesi mukabilinde çıkan senedat-ı katîyeye meccanen tamga vaz olunacaktır.

On Birinci Madde: Çekler ve ilânnâmeler ve havâle senedleri tarifesinde münderic
olan resm-i maktuı verilerek tamga etdirilecek ve yahud ol
bahada pul vazıyla on beşinci maddede beyan olunduğu vechile ibtal
olunacaktır.

Gazetelere dahi tarife-i mahsusasında münderic olan resm-i maktuı alınarak
anlara mahsus tamga urulacaktır.