318

Gerek muvakkat ve gerek kat’î hisse senedâtile tahvilâtdan bir def’alık olarak yüzde bir hesabile alınacak resm-i damga şirket idâreleri tarafından îfâ ve te’diye olunacakdır. Ve doksan bir senesi Mart’ından sonra teşkîl olunacak o misillü şirketlerin gerek muvakkat ve gerek kat’î hisse senedâtile tahvîlâtı koçanlı olacağından vurulacak damga hem koçanı ve hem de yaprağı üzerine darp olunacak ise de târîh-i mezkûra kadar çıkarılmış bulunan senedât ve tahvilâtdan alınacak resim bunların mikdârı koçanlarının ibrâzile ve yâ sûret-i sâire ile isbât ve ta’yîn olundukdan sonra ber-minvâl-i muharrer şirket tarafından te’diye ve îfâ olunup Rüsûmât Emâneti cânibinden işbu resmin îfâ kılındığı Dersaâdet gazeteleri vâsıtasile i’lân olunduğu hâlde senedât ve tahvilât-ı mezkûreye damgalanmış nazarile bakılacak ve ondan sonra bunlardan damgalanmak üzere Damga İdâresi’ne getirilecek olanlara meccânen damga vurulacakdır. İşbu yüzde bir resmin îfâsı içün şirketlere mezkûr Mart ibtidâsından i’tibâren nihâyet altı mâh mühlet i’tâ olunup bu müddet zarfında resm-i mezkûr te’diye olunmadığı hâlde Damga Nizâmnâmesi’nin yirmi dördüncü mâddesi mûcibince cezâ-yı nakdî alınacakdır.

Evrâk-ı sahîha ve pullar Dersaâdet’de Damga İdâresi tarafından ta’yîn olunan mevâki’-i müte’addide-i mahsûsada bâi’ler ma’rifetile fürûht olunacak ve işbu bâi’lerin bulunduğu dükkânlar üzerinde “Varaka-i Sahîha ve Pul” ibâresile birer levha ta’lîk kılınacakdır. Ve taşralarda mezkûr evrâk ve pullar Rüsûmât idârelerinde ve bunların tedârik ve ta’yîn eylediği bâi’ dükkânlarında satılacakdır. Evrâk-ı âdiye üzerine darp-ı damga mu’âmelâtı yalnız Dersaâdet’de Damga İdâresi’nde icrâ olunacakdır.

Fî 11 Muharrem sene [1]292 ve fî 6 Şubat sene [1]290

( Rüsûmât )