343

Lüzûmu tekrar kendisine tahrîren teblîğ olunup bir hafta mürûrunda akçeyi vermez veyâ tütünü idâreye teslîm etmez ise kefîline ve kefîli olmadığı hâlde nizâmât-ı mevcûde ve usûl-i mer’iyesine tatbîkan lâzım gelen mahkeme ma’rifetiyle emvâl ve emlâk-i mevcûdesinin haczi zımnında cânib-i hükûmete mürâcaat olunacaktır.

* Fasl-ı Hâmis *

( Tütünün i’mâline mahsûs fabrikalarla sarfiyât )
( Resmin sûret-i istîfâsına dâirdir )

Otuz dördüncü madde — Bin iki yüz doksan senesi Martı ibtidâsından i’tibâren ba-ma’rifet-i hükûmet rüsûmât idâresi tarafından tahsîs olunan mahallerden gayri yerlerde az ve çok ve her ne sûretle olur ise olsun tütün kıymak ve cıgar ve cıgaret ve enfiye ve ağız tütünü yapmak ve tütün kıyacak ve cıgar ve cıgaret ve enfiye ve ağız tütünü yapacak her nev’ âlât ve edevât bulunmak külliyen memnû’dur.

Otuz beşinci madde — Tütün kıymak içün başlıca fabrika küşâd etmek isteyenlere şerâit-i âtiye ile ruhsat verilir.

Evvelâ — Tütün i’mâline mahsûs fabrika ihdâs ve küşâd etmek murâd edenler fabrikayı açacağı mahallin rüsûmât idâresine bir arzuhâl verip derûnunda fabrika ittihâz edeceği mahalli ve bunda ne makûle ve en ziyâde ne kadar âlât isti’mâl edeceğini ta’yîn edecektir.

Sâniyen — Arzuhâlinde ta’yîn eylediği mahal hükûmet-i mahalliye ve idâre ma’rifetiyle bil-muâyene bu mahallin fabrika ittihâzında zâbıta ve belediyece bir gûne mahzûru ve birden ziyâde kapısı ve komşusuna açılır penceresi ve yâhud alçak duvar ve tahta perde ve zîr-i zeminden tarîk gibi hâricle muhâbere ve teâtî-i eşyâ mümkün olur ciheti olmadığı tahakkuk edecek ve sokak üzerine olan pencerelerine demir telden ma’mûl yerli ve gâyet ince kafes koymağa sâhibi mecbûr olacaktır.

Sâlisen — Fabrika olacak mahallin içinde fabrikacıdan ve fabrikanın direktör ve kâtibiyle ameleden mâadâ hiç bir kimsenin ve bunların familya ve taallukâtlarının ikâmet ve beytûtetleri câiz olmayacaktır.