354

Mahallde işlenmediği hâlde işlenme ve sâire firesi olarak her bir nev‘ine göre zuhûr edecek noksânları cedvel-i mezkûrda beyân olunan mikdârlara kadar kabûl olunup ol mikdârlardan ziyâde zuhûrunda asıl tütünün resm-i mürûriyesi evvelce verilmiş ise yalnız resm-i sarfiyâtı eñ yüksek fî'ât hesâbıyla ve eğer bu noksân ecnebiye gönderilmek üzere bâ-sened iddihâr olunmuş tütünden zuhûr eylediği hâlde resm-i mezkûr mürûriye resmiyle berâber sâhiblerinden istîfâ kılınır.

Yetmiş beşinci mâdde
İşlenmiş ve firesi tenzîl olunmuş bir tütün bulunduğu mahalden kaldırılıp başkaca nakliye dâhil-i memâlikde dîğer bir cihete nakl olunduğu hâlde bu ikinci mahalde vaz‘ olunacak tüccâr mağazasında durduğu müddet içün dahi cedvelde nev‘ine göre gösterilen mikdârlara kadar fireleri kabûl olunup ol mikdârlardan fâhiş noksân zuhûrunda mikdâr-ı fâhişin sarfiyât resmi eñ yüksek fî'ât hesâbıyla sâhibinden tahsîl kılınır.

Yetmiş altıncı mâdde
Fabrikalara idhâl olunan tütünleriñ ba‘de’l-i‘mâl ihrâcında lede’l-muvâzene zuhûr edecek fireleri cedvel-i mezkûrda muharrer mikdârı tecâvüz etmedikçe kabûl olunur ve mikdâr-ı mezkûru tecâvüz eden noksânıñ sarfiyât resmi eñ yüksek fî'âtdan hesâb ile fabrikacıdan alınur.

(Duhânıñ)