360

Olduğu halde evvel-emirde mahalleri rüsumat idarelerince tahkikat-ı lâzıme
icrasıyla ef'ali merkez-i sübûta getirilerek ve icab eden hüküm tayin olunarak
ol babda rüsumat nazırına irsal olunacak evrak-ı tahkikiye üzerine iltiması
lâzım gelen ceza-yı nakdi elli lirayı mütecaviz değil ise nazır-ı mumaileyhin
tasdikiyle ve ol mikdardan ziyade olduğu takdirde nuzzar taraflarından rüsumat
emanetine gönderilecek evrak-ı tahkikiye üzerine rüsumat meclisinden verilecek
hüküm mucibince tahsil ve istifa olunur meclis-i mezburun hükmü yüz aded
lira-yı osmaniyi mütecaviz olmadıkça hiç bir mahkemede kabil-i istinaf olmayıp
ol mikdardan ziyade olup da mahkûmun aleyh istinaf eder ise mahkeme-i ticarette
rüyet ve tetkik caiz olacaktır

Doksan üçüncü madde: İşbu nizamname bin iki yüz doksan sene-i maliyesi
Martı ibtidasından itibaren memalik-i mahruse-i şahanede hasıl olan duhanın
rüsumat ve ihracat nizamnameleri makamlarına kaim olacaktır

Doksan dördüncü madde: Bu nizamnamenin icrasına rüsumat emaneti memurdur

( Mevadd-ı Müteferrika ve Muvakkata )

İşbu bin iki yüz seksen dokuz senesi şubatı gayetine kadar usul-i cariye
mucibince resm-i müruriyesi verilmiş olduğu tezkere-i makbule isbat olunan
tütünlerden tekrar müruriye resmi alınmayacaktır
Usul-i cariye üzerine müruriye resmi vermiş bulunan tütünler diyar-ı ecnebiyeye
gönderilecek olur ise yirmi birinci madde hükmünden istisna bunların resmi
red olunmayacaktır

Bu nizamname doksan senesi zarfında evvel ve ahir tab ve neşr olunan nizamnamelerin
yerine kaim olup onlarda bunun ahkamına mugayir olarak münderic olan mevad
külliyen mensuhtur

Muahharan vuku bulan tadilat üzerine icra-yı icabı hakkında şeref-sadır olan
ferman-ı âli tarihi fi 29 Safer sene 1292 ve fi 25 Mart sene 91
(Dört)