37

Suret-i tayini gösterilen zabıta memurine müracaat olunacakdır

Yirmi üçüncü madde: Nahiye meclislerinin vezaifinden biride emval-i devletin mükellefin-i ahaliden tahsil ve hükümete teslimi maddesidir. Binaenaleyh bunlar emval-i miriyeyi tahsil ve merkez-i kazaya teslim etdirmekle memurdurlar. Eğer kendileri emr-i tahsilde bir gûne müşkilata tesadüf ederler ise kazalarda bulunacak tahsil yoklamacısına müracaat eyleyecekler ve o dahi muktedir olamaz ise merkez-i kazadan taleb-i muavenet edeceklerdir.

Yirmi dördüncü madde: Her merkez-i nahiyede vergi ve bedel-i askeri ve a'şar ve mürettebat-ı miriye-i sairenin kazadan gelecek defter mucibince karye be-karye kaydı bulunacakdır.

Yirmi beşinci madde: Nahiye meclisleri dahil-i daireleri bulunan mahaller mürettebat-ı miriyesinin bakaya kalmayarak vakit ve zamaniyle istihsaline gayret edecekler ve sene nihayetinde bilcümle tahsilatın ve kaza mal sandığına vuku bulan teslimatın hesablarını dahi vereceklerdir.

Yirmi altıncı madde: Her nahiye dairesinin kâtibi dairenin umur-ı hesabiyesini rüyet etmekle dahi memurdur ve tahsilata müteallik mevaddan maada işler içün iktiza etdikçe azanın mühürleriyle tasdik tahtında ilmühaber vermeğe mezundur. İşbu kâtibler kefalete rabt ile istihdam olunacaklardır.

Yirmi yedinci madde: Nahiye meclislerinin birer mühür-i mahsusu bulunacakdır.

Yirmi sekizinci madde: Bazı kazaların en mühim noktasında ve kule ve derbend gibi mahallerde hıfz-ı asayiş içün bulundurulan asakir-i zabtiyeye kumanda etmek üzere taraf-ı devletden münasib mikdar maaş tahsisiyle birer zabıta memuru tayin kılınacağından bunlar nevahi dairelerinin umur-ı zabıtasına takayyüd ve itina edeceklerdir.

Fi 11 Rebiülevvel sene 293 ve fi 25 Mart sene 292