404

Yahud bâ-sened âhirde satun aldığı bir mülk dükkân içün bu dükkânı felan kimesne içün almışidim semen olarak verdiğim akçe dahi anın malındandır ve senedde ismim müstear olarak kayd olunmuşdur dese ol dükkân nefsü’l-emrde ol kimesnenin mülkü olduğunu ikrar etmiş olur.

1593 Madde Bir kimesne bâ-sened felan kimesne zimmetinde olan şu kadar guruş alacak her ne kadar senedde benim nâmıma muharrer ise de meblağ-ı mezbûr felan kimesnenindir senedde ismim müsteardır dese meblağ-ı mezbûr nefsü’l-emrde ol kimesnenin hakkı olduğunu ikrar etmiş olur.

1594 Madde Bir kimse hâl-i sıhhatde iken ber-vech-i bâlâ ikrar ile nefy-i mülk etmiş olsa yahud isminin müstear olduğunu ikrar etse ikrarı muteber olup hâl-i hayatında kendisi ve vefatından sonra veresesi bu ikrar ile ilzam olunur.
Amma maraz-ı mevtinde iken ol vechle ikrar etse hükmü fasl-ı âtîden müstebân olur.

Fasl-ı Sâlis
( İkrar-ı marîz beyanındadır )

1595 Madde Maraz-ı mevt ol hastalıktır ki ekseriyâ inde ölüm korkusu olduğu halde hasta zükûrdan ise hânesi haricinde ve inâsdan ise hânesi dahilinde olan mesâlihini görmekten âciz olup bu hâl üzere bir sene mürur etmeden vefat eyleye gerek sâhib-i firâş olsun ve gerek olmasın.
Ve eğer marîzin marazı mümted olup da dâimâ bir hâl üzere bir sene geçer ise ol marîzin marazı müştedd ve hâli mütegayyir olmadıkça sahîh hükmünde olup tasarrufâtı sahîhin tasarrufâtı gibidir.
Amma marazı müştedd ve hâli mütegayyir olup da bir sene geçmeden vefat ederse vakt-i tagayyürden itibâren vefatına dek olan hâli maraz-ı mevt addolunur.

1596 Madde Hiç vârisi olmayan kişinin yahud zevcesinden başka vârisi olmayan âdemin veyahud zevcinden başka vârisi olmayan kadının maraz-ı mevtinde ikrarı bir nevi‘ vasiyet olarak muteber olur.

( Binâen )