405

Binâenaleyh vârisi olmayan kişi maraz-ı mevtinde cemî-i emvâlini bir kimesneye ikrar ile nefy-i mülk etse sahîh olup vefâtından sonra terekesine emîn-i beytülmâl tarafından müdâhalede olunamaz.

Kezâlik zevcesinden başka vârisi olmayan kimse maraz-ı mevtinde cemî-i emvâlini zevcesine yâhud zevcinden başka vârisi olmayan kadın cemî-i emvâlini zevcine ikrar ile nefy-i mülk etse sahîh olup ba'de'l-vefât bunlardan birisinin terekesine emîn-i beytülmâl tarafından müdâhalede olunamaz.

1597 Madde
Bir kimse marîz iken veresesinden birine mal ikrar edip de ba'dehu ol marazdan ifâkat bulsa bu ikrarı mu'teber olur.

1598 Madde
Bir kimse maraz-ı mevtinde vârislerinden birine bir ayn yâhud deyn ikrar ettikten sonra fevt olsa dîger vârislerin icâzetine mevkûfdur anlar mucîz olurlarsa anın ikrarı dahi mu'teber olur.

Ve eğer anlar mucîz olmaz ise anın ikrarı dahi mu'teber olmaz.
Şu kadar var ki mukirrin hayâtında dîger vârisler anı tasdîk etmişler ise vefâtından sonra anlar bu tasdîklerinden rucû' edemeyip ol ikrar mu'teber olur.

Ve bir de vârise emânet ikrarı her hâlde sahîhdir.
Şöyle ki bir kimse kendisinin bir vârisinde olan emânetini kabz etmiş yâhud vârisinin kendisinde olan emânet-i ma'lûmesini istihlâk eylemiş idüğünü maraz-ı mevtinde ikrar eylese sahîh olur.

Meselâ fülân oğlumda vedîa olan malımı ahz ve kabz etmişimdir deyu ikrar etse sahîh ve mu'teber olur.
Ve kezâ fülân kimsede olan alacağımı fülân oğlum bi'l-vekâle ahz edip bana teslîm etmişdir dese ikrarı mu'teber olur.

Kezâlik fülân oğlumun bende vedîa yâhud âriyet olan beş bin guruşluk elmas yüzüğünü satıp semenini kendi umûruma sarf ve istihlâk etmişimdir dese ikrarı mu'teber olup ol yüzüğün kıymeti terekeden tazmîn olunmak lâzım gelir.

1599 Madde
Bu mebhasda vârisden murâd marîzin vakt-i vefâtında vâris bulunan kimsedir.