407

Ya'ni terkesi garîm olan kimesnenin hâl-i sıhhatinde zimmetine ta'alluk eden düyûnu
maraz-ı mevtindeki ikrarıyla zimmetine ta'alluk eden düyûnu üzerine takdim kılınır.
Şöyle ki marîzin terkesinden evvelâ düyûn-ı sıhhat istîfâ kılınıp ba'dehu fazla
kalır ise düyûn-ı maraz te'diye olunur.
Fakat marîzin maraz-ı mevtinde esbâb-ı ma'rûfe ile ya'ni ikrardan başka nâsın
müşâhed ve ma'lûmu olan şirâ ve istikraz ve itlâf-ı mal gibi sebeplerle zimmetine
ta'alluk eden düyûnları düyûn-ı sıhhat hükmündedir.
Mukarrun bih a'yânından bir şey olduğu sûretde dahi hükmü bu minvâl üzeredir.
Ya'ni bir kimesne maraz-ı mevtinde ecnebiye her ne dürlü şey ikrar etse düyûn-ı
sıhhati yâhud ber-vech-i bâlâ esbâb-ı ma'rûfe ile lâzım gelerek düyûn-ı sıhhat hükmünde
olan düyûnu te'diye olunmadıkça mukarrun leh mukarrun bihe müstehak olmaz.
1603 Madde: Bir kimesne kendisinin bir ecnebi kimsede olan alacağını istîfâ
etmiş olduğunu maraz-ı mevtinde ikrar ettikde nazar olunur;
eğer bu alacağı kendisinin hâl-i marazında iken ol kimesnenin zimmetine ta'alluk
etmiş ise bu ikrarı sahîh olur
fakat guremâ-yı sıhhat hakkında nâfiz olmaz.
Ve eğer bu alacağı kendisinin hâl-i sıhhatinde iken ol kimesnenin zimmetine ta'alluk
etmiş ise her hâlde sahîh olur gerek düyûn-ı sıhhat olsun
ve gerek olmasun.
Meselâ bir marîzin hâl-i marazında iken bir mal sattıktan sonra semenini
kabz etmiş olduğunu ikrar etse sahîh olur ise de guremâ-yı sıhhat
var ise anlar bu ikrarı tutmamağa kâdir olurlar. Ve eğer hâl-i sıhhatinde iken
bir mal sattıktan sonra semenini kabz etmiş olduğunu maraz-ı mevtinde ikrar
etse her hâlde sahîh olup guremâ-yı sıhhat olsa dahi anlar bu ikrarı
tutmaz diyemezler.
1604 Madde: Kimesne maraz-ı mevtinde dâinlerinden birinin deynini edâ ile sâir
dâinlerinin hukukunu ibtâl edemez.
Fakat marîz iken istikraz eylediği parayı ve iştirâ eylediği malın semenini edâ
edebilir.