408

1605 Madde — Bu mebhasde kefâlet bi’l-mâl deyn-i aslî hükmündedir.
Binâenaleyh bir kimesne maraz-ı mevtinde vârisinin borcuna yâhud alacağına kefil
olsa nâfiz olmaz.
Ve ecnebiye kefil oldukda sülüs-i mâlından mu‘teber olur.
Ammâ hâl-i sıhhatinde iken ecnebiye kefil olduğunu maraz-ı mevtinde ikrâr etdikde
mecmû‘-i mâlından mu‘teber olur.
Şu kadar ki duyûn-ı sıhhat var ise takdîm olunur.

Bâb-ı Râbi‘
( İkrâr bi’l-kitâbe beyânındadır )

1606 Madde — Kitâbetle ya‘nî yazı ile ikrâr lisân ile ikrâr gibidir.
(69) maddeye bak.

1607 Madde — Bir kimesnenin kendi ikrârını yazmak üzere âhare emr etmesi
hükmen ikrârdır.
Binâenaleyh filân kimesneye şu kadar guruş borcum olduğuna dâir bir sened yaz deyu
kâtibe emr ederek yazdırıp da imzâ eylemiş yâhud mühürlemiş olduğu sened kendi
hatt-ı destiyle olan sened gibi ikrâr bi’l-kitâbe kabîlindendir.

1608 Madde — Tüccârın mu‘teber-i bih olan defterlerindeki kuyûdu dahi ikrâr
bi’l-kitâbe kabîlindendir.
Meselâ bir tâcir bir kimesneye şu kadar guruş borcu olduğunu kendi defterine
kayd etmiş olsa ol kimesneye ol kadar borç ikrâr etmiş olup lede’l-hâce
ikrâr-ı şifâhîsi gibi mu‘teber ve mer‘î olur.

1609 Madde — Bir kimse kendisi yazıp yâhud bir kâtibe yazdırıp da mumzâ
yâhud mahtûm olarak âhare vermiş olduğu deyn senedi eğer mersûm
ise ya‘nî resm ve âdete muvâfık olarak yazılmış ise ikrâr bi’l-kitâbe olup
takrîr-i şifâhîsi gibi mu‘teber ve mer‘î olur.
Ber-mu‘tâd verilegelen vusûller ya‘nî makbûz ilmühaberleri dahi bu kabîldendir.

1610 Madde — Bir kimse ber-vech-i bâlâ mersûm olarak yazıp yâhud
yazdırıp da mumzâ yâhud mahtûm olarak vermiş olduğu deyn senedi
kendisinin olduğunu mu‘terif iken hâvî olduğu borcu inkâr etse
inkârına i‘tibâr olunmayıp ol borcu îfâ eylemesi lâzım gelir.

( Ammâ )