425

1672 Madde
Müteveffânın diğerinde olan bir malını da'vâda veresesinden ba'zıları hakkında mürûr-ı zamân bulunmuş iken diğer ba'zısı hakkında sağîr gibi bir 'uzr ile mürûr-ı zamân bulunmadığına mebnî ol malı da'vâ ve isbât etdikde müdde'âbihde olan hissesi kendisine hükm olunur ve bu hükm sâir vereseye sirâyet etmez.

1673 Madde
Bir kimse bir 'akârda müste'cir olduğunu mukir iken on beş seneden ziyâde zamân mürûr etmekle oña mâlik olamaz. Ammâ inkâr edip de mâlik dahi ol 'akâr benim mülkümdür şu kadar sene mukaddem saña îcâr etmiş idim dâimâ ücretini kabz ederim deyu da'vâ etdikde nazar olunur. Eğer îcârı beyne'n-nâs ma'rûf ise da'vâsı istimâ' olunur değil ise istimâ' olunmaz.

1674 Madde
Takâdüm-i zamân ile hak sâkıt olmaz. Binâenaleyh mürûr-ı zamân bulunan bir da'vâda müdde'â-aleyh huzûr-ı hâkimde müdde'înin da'vâsı vechile hâlâ kendisinde hakkı olduğunu sarâhaten ikrâr ve i'tirâf ediyor ise mürûr-ı zamân i'tibâr olunmayıp müdde'â-aleyhin ikrârı mûcibince hükm olunur. Ammâ müdde'â-aleyh huzûr-ı hâkimde ikrâr etmeyip de müdde'î anın diğer mahalde ikrâr etmiş olduğunu da'vâ eder ise müdde'înin asıl da'vâsı istimâ' olunmadığı gibi ikrâr da'vâsı dahi istimâ' olunmaz. Fakat da'vâ olunan ikrâr mukaddemâ müdde'â-aleyhin ma'rûf olan hat veyâhut hatmini hâvî bir senede rabt olunup da ol senedin târîhinden vakt-i da'vâya kadar mürûr-ı zamân müddeti bulunmamış ise o sûretde ikrâr da'vâsı istimâ' olunur.

1675 Madde
Tarîk-i 'âm ve nehir ve mer'â gibi menâfi'i 'umûma 'âid olan yerlerin da'vâsında mürûr-ı zamâna i'tibâr olunmaz. Meselâ bir karyeye mahsûs olan mer'âyı bir kimse bilâ-nizâ' elli sene zabt ve tasarruf etdikden soñra karyesi ahâlîsi ol mer'âyı ondan da'vâ etseler istimâ' olunur.

İrâde-i Seniye târîhi fî 9 Cemâziyelâhir sene 293

28