428

On Altıncı Madde: Âsâr-ı atîka taharrîsiçün icrâ-yı hafriyât olundığı esnâda bir mazarrat görüldüğü ve ameliyâtın inkızâsında hafr olunan mahaller hükûmet-i mahalliye ma‘rifetiyle mu‘âyene olunup hafriyât-ı vâkı‘anın umûma mazarratı anlaşıldığı hâlde masârifi taharrî iden tarafından tesviye olunmak üzere mazarrat def‘ ettirilmedikçe yedinde bâkî kalan âsârdan hissesine isâbet iden mikdâr tevkîf kılınacaktır.

On Yedinci Madde: Gerek Devlet-i Aliyye ve gerek düvel-i sâire me’mûrlarına dâire-i me’mûriyetleri dâhilinde bulunan mahallerde kendü mutasarrıf oldukları emlâklerin hâricinde nâmlarına olarak âsâr-ı atîka veyâhûd defîne taharrîsiçün ruhsat virilmeyecektir.

On Sekizinci Madde: Ruhsatnâmenin hâmili tarafından şahs-ı âhara terk ve bey‘i câiz olmayacaktır.

On Dokuzuncu Madde: Şahs-ı vâhide bir zamanda iki muhtelif mevkide hafriyât icrâsına ruhsat virilmeyecektir.

Yirminci Madde: Ruhsatnâme târîhinden i‘tibâren üç ay zarfında hafriyâta mübâşeret edilmez veyâhûd mübâşeret edilip de bilâ-uzr iki ay terk edilür ise ruhsatnâmenin hükmü münfesih olur.

Yirmi Birinci Madde: Hafriyât icrâ olunacak mevki‘ hükûmetçe nezâret-i mütemâdiye icrâsı müşkil olacak derecede ma‘mûreden ba‘îd olur ise sâhib-i ruhsat refâkatine masârifi anıñ tarafından tesviye kılınmak üzere bir me’mûr ta‘yîn olunacaktır.

Yirmi İkinci Madde: Hafriyât içün vukû‘bulacak her dürlü masârif ruhsat alan kimse tarafından tesviye olunacaktır.

Yirmi Üçüncü Madde: Mülk ve tetimme-i süknâ olmayan mahallerde âsâr-ı atîka zuhûrı maznûn olup da devlet tarafından icrâ-yı hafriyât olunmak istenildiği hâlde bu makûle yerler başkalarına virilmeyecektir.

Yirmi Dördüncü Madde: Devletin icrâ-yı hafriyât edeceği yerler efrâd uhdesinde ise sâhibince vâkı‘ olabilecek hasâr tazmîn edilecektir.

( Fasıl )