458

( Arazi hakkında fıkarat-ı nizamiyedir )

Birinci madde Memalik-i Mahruse-i Şahanede bulunan kura ve mezari ve çiftlikât arazisinden olarak canib-i miriye veyahud vakfa aid olub da bil-müzayede ihale kılınacak veyahud efrad-ı nâs tarafından ferağ olunacak arazinin tefviz ve teferruğunda teb'a-i müslime ve gayr-i müslime siyan olub şöyleki mahalleri teamül-i kadimine itba'en arazi-i miriye ve mevkufeden teb'a-i gayr-i müslimeye tefvizi icra olunmayan mahaller olduğu halde o misillü teamülün feshi ve lağviyle ahkam-ı kanuniye siyan olarak icra kılınacakdır.

İkinci madde Teb'a-i müslime ve gayr-i müslimenin yekdiğerinden teferruğ etdikleri arazi ve emlak hakkında dahi Kanunname-i Hümayun ahkamına tevfikan muamele-i mütesaviye icra olunacakdır.

Üçüncü madde Teb'a-i müslime ve gayr-i müslimeden ba'zı çiftlikâtda mezari' bulunan çiftçilerin ind'el-müzayede satılan ve gerek efrad-ı nâs tarafından ferağ olunan arazinin vakti tefviz ve teferruğunda hakk-ı rüçhanları olacakdır.

Fi 7 Muharrem sene 293 ve fi 22 Kanun-ı Sani sene 291

( Tapu nizamnamesinin altıncı maddesine zeyl olunan )
( fıkra-i nizamiyedir ) [8]

Arazi-i emiriye ve mevkufe ve müsakkafat-ı mevkufe ve emlak-ı sırfeden âhara ferağ ve bey' olunanların mübayaa kıymeti noksan haber verildiğini arazi ve evkaf me'murlarından maada her kim canib-i hükümete bil-ihbar isbat-ı müdde'a eder ise kıymetin noksan haber verilen mikdarına isabet iden harc-ı ferağ iki kat olarak bayi' ve müşteriden münasafa bil-istihsal nısfı hazine-i celileye irad kayd olunacak ve nısf-ı diğeri muhbirine verilecekdir.

Fi 24 Cemaziye'l-ahir sene 1292 ve fi 14 Temmuz sene 1291

[8] Mezkur madde birinci cildin 201 nci sahifesinde mündericdir (Tapu)