467

Dairesinde mecalis-i idareden verilecek mazbata üzerine Defter-i Hakani memurları taraflarından muamele-i kaydiyesi bil-icra muvakkat ilmühaberleri ita kılınacaktır.

On yedinci madde: Taşralarda bulunan icareteynlü musakkafat ve müstegallat-ı mevkufenin icare-i müecceleleri kemâkân sene-be-sene evkaf muhasebecileri marifetiyle tahsil olunacağı ve mahlûlatının dahi anlar marifetiyle müzayede ve tefviz kılınacağı cihetle hem icarat-ı müecceleyi beher sene yerlü yerinde tahsil etmek ve hem de ileride bunlardan intikalleri tevsi‘ edilenlerin keyfiyetlerini bilüp mahlûl olanlar ile olmayanlarını tefrik ve temyiz ederek icarenin tahsiline medar olmak ve evkaf muhasebecileri nezdinde bulunacak kuyudat tashih edilmek içün ferağ ve intikal ve sair muamelat ve vukuatı mübeyyin Defter-i Hakani memurları tarafından beher mah bir kıt‘a defter tanzimiyle evkaf muhasebecilerine ita kılınacaktır.

( Madde-i Mahsusa )

On sekizinci madde: Gerek Dersaadet ve gerek taşralarca muamelat-ı dahiliyeye ve Defter-i Hakani memurlarının bu babda suret-i hareketlerine dair icab eden talimat Defter-i Hakani Nezareti’nden peyderpey tanzim ve kendilerine irsal ve tevdi‘ olunacaktır.

Fî 9 Rebiülevvel sene 93 ve fî 23 Mart sene 92

( Emlak Dairesi’ne vürud eden ilmühaberlerin suret-i muntazamada )
( tanzimine dair tenbihname )

Birinci madde: Ashab-ı emlakin ferağ ve intikal ve inşaat içün Şehremaneti Emlak Dairesi’ne götürecekleri ilmühaberler emlak-ı mezkûrenin vaki‘ olduğu mahallenin imamı tarafından taleb ve ahz olunacağı derkâr ise de