487

Bâlâda muharrer müddetin inkızâsında reyler cem‘ olunup netîce-i intihâbâtı hâvî bir kıt‘a mazbata tanzîm ve istihsâl-i ârâya me’mûr olanlar tarafından imzâ olunur.

Ekseriyet-i ârâyı kazananların komite a‘zâsı olmak üzere isimleri i‘lân olunur. A‘zâdan iki veyâ birkaçı hakkında müsâvât-ı ârâ hâsıl olduğu hâlde kur‘a keşîdesine mürâcaat kılınır.

Mübâyaacılardan gayrıya verilen reyler ke-en lem yekün hükmünde tutulur. Komite a‘zâlığından munfasıl olan zâtlar tekrâr komite a‘zâlığına intihâb olunabilirler.

On üçüncü madde — Madde-i sâbıkanın hilâfına olarak birinci komitenin emr-i intihâbı hükûmet komiserinin taht-ı nezâretinde icrâ olunup bu husûs için maiyyetine her gün mübâyaacılar tarafından müntehab ikişer nefer a‘zâ refîk olunacaktır.

Üçüncü Fasıl
( Komitenin Vezâifi )

On dördüncü madde — Borsa a‘zâsı tarafından intihâb olunan komite her sene alafranga Mart ibtidâsında işe mübâşeret eyler. Sene-i sâbıkanın muhâsebâtı iki a‘zâ tarafından mezkûr komiteye devr ve teslîm olunur.

On beşinci madde — Komite kendi a‘zâsından birini reîs ve ikisini dahi sandık emîni intihâb ve ta‘yîn eder. İşbu me’mûriyetler meccânen îfâ olunur hizmetlerdendir. Hâricden almak üzere komitece bir de kâtib ta‘yîn edilip işbu kâtib muvazzaftır.

On altıncı madde — Vech-i meşrûh üzere teşekkül eden komite ayda dört def‘a âdiyen ictimâ‘ eder. Evvelâ her on beş günde bir kere ( likidasyon ) ya‘ni kat‘-ı hesâb-ı umûmî günü borsanın kapalı olduğu vakitte dördüncü maddede beyân olunduğu üzere borsa a‘zâlığına tâlib olanların müsted‘iyâtını tedkîk etmek ve on sekizinci maddede muharrer mevâdd üzerine müzâkere eylemek üzere mezkûr kat‘-ı hesâb gününü ta‘âkıb eden Pazar ertesi günleri akd olunur.