49

Binaenaleyh bir bağçe satılıp da bir kimse anın hakk-ı şürb-i hâsında ve diğer biri tarîk-i hâsında halît olsa hakk-ı şürb sâhibi hakk-ı tarîk sâhibi üzerine tercîh ve takdîm olunur.

Fasl-ı Sâni
( Şerâit-i şüf’a beyânındadır )

1017 Madde: Meşfûun mülk-i akar olması şarttır.
Binaenaleyh sefinede ve sâir menkulâtda ve vakıf akarda ve arâzi-i emîriyede şüf’a câri olmaz.

1018 Madde: Meşfûun bihin dahi mülk olması şarttır.
Binaenaleyh bir mülk akar satıldıkda ittisâlinde bulunan vakıf akarın mütevellîsi yâhud mutasarrıfı şefî’ olamaz.

1019 Madde: Vakıf yer yâhud arâzi-i emîriye üzerindeki mülk eşcâr ve ebniye menkul hükmünde olarak bunlarda şüf’a câri olmaz.

1020 Madde: Bir mülk arsa üzerindeki eşcâr ve ebniye ile berâber satıldıkda yere tebean eşcâr ve ebniyede dahi şüf’a câri olur.
Ammâ yalnız eşcâr ve ebniye satıldığı sûretde şüf’a câri olmaz.

1021 Madde: Şüf’a ancak akd-i bey’ ile sâbit olur.

1022 Madde: Hibe bi-şarti’l-ivaz bey’ hükmündedir.
Binaenaleyh bir kimse mülk hânesini bi-şarti’l-ivaz âhara hibe ve teslîm etse câr-ı mülâsıkı şefî’ olur.

1023 Madde: Bilâ-ivaz hibe ve mîrâs ve vasiyet gibi bilâ-bedel âhara temlîk olunan akarda şüf’a câri olmaz.

1024 Madde: Şefî’in vâki’ olan akd-i bey’e sarâhaten yâhud delâleten rızâsı olmamak şarttır.
Meselâ akd-i bey’i işittikde pek a’lâ dese hakk-ı şüf’ası sâkıt olup andan sonra taleb-i şüf’a edemez.
Ve kezâ bey’in akd olundığını işittikden sonra akar-ı meşfû’u müşteriden iştirâ yâhud isticâr etmek istese hakk-ı şüf’ası sâkıt olur.
Kezâlik bir kimsenin bayi’e vekîl olup da sattığı akarda hakk-ı şüf’ası