500

Mûcebince amel oluna
( Tevcihat-ı Cihat Nizamnamesidir ) [*]

Birinci Madde — Meşrutiyet vechle tasarruf olunan cihetler ile Dersaadet’de bulunan Buharî ve Şifa-i Şerif ve dersiye cihetlerinden maada bilumum evkaf-ı mazbûta ve mülhakaya merbut olan cihat-ı mütenevvia ashabından biri vefat eyledikde uhdesinde bulunan cihet ol cihetin hizmetini ifaya ehliyet ve iktidarı muhakkak olan kebir oğluna ve evlad-ı kibarı müteaddid ise içinden ehliyet ve iktidarı olan oğluna ve şayet evlad-ı kibarı iktidar ve ehliyetde müsavi bulunur ise ekberine tevcih kılınır ve kebir evladının ehliyet ve iktidarı bulunmadığı halde sağir oğluna ve evlad-ı sıgarı müteaddid olur ise ekberine tevcih olunur ve sağir ve kebir asla evladı olmadığı veyahud yalnız evlad-ı kibarı bulunub da ol cihetin hizmetini ifaya ehliyet ve iktidarları bulunmadığı halde ol cihet haricden ehil ve erbabına tevcih edilir.

İkinci Madde — Cihat-ı müteaddideye mutasarrıf olanlardan biri yalnız bir nefer sağir oğlunu terk ederek vefat eyledikde uhdesinde bulunan cihetler şahs-ı vahidde ictimaı caiz olan cihetlerden olduğu halde cümlesi ona tevcih olunur ve eğer şahs-ı vahidde ictimaı caiz olmayan cihetlerden ise içinden en faidelisi ona ve diğeri haricden ehil ve erbabına tevcih edilir.

Üçüncü Madde — Cihat-ı müteaddide mutasarrıflarından biri yalnız müteaddid evlad-ı sıgarını terk ederek vefat eyledikde cihat-ı mahlûle bunlara kur’a ile taksim ve başka başka tevcih olunur ve müteaddid evlad-ı sıgarıyla bir nefer kebir oğlunu terk ederek vefat eyledikde cihat-ı mahlûleden kebir oğlunun ehil ve müstahak olduğu cihet ona ve diğerleri evlad-ı sıgarına ve kebir oğlunun cihat-ı mahlûleden hiç birine ehliyet ve istihkakı yoğise cümlesi evlad-ı sıgarına taksim ve tevcih kılınır ve bir nefer kebir ve bir nefer sağir oğlunu terk ile vefat edenlerin uhdelerinden munhal olan cihat-ı müteaddide kebir oğlunun ehliyet...

__________
[*] Atik nizam ikinci cildin 177 nci sahifesinde mündericdir.

( ve istihkakı )