52

1038 Madde — Taleb-i muvasebe ve taleb-i takrirden sonra müşterinin bi’t-terazi teslimi yahud hâkimin hükmü ile şefi‘ henüz meşfu‘a mâlik olmadan fevt olsa hakk-ı şuf‘a veresesine intikal etmez.

1039 Madde — Şefi‘ iki talebden sonra henüz ber-vech-i meşruh meşfu‘a mâlik olmadan meşfu‘ bihi satılsa hakk-ı şuf‘ası sakıt olur.

1040 Madde — Şefi‘ ber-vech-i meşruh henüz meşfu‘a mâlik olmadan mülk-i meşfu‘un ittisalinde diğer bir mülk-i akar satılsa bu ikinci akara şefi‘ olamaz.

1041 Madde — Şuf‘a tecezzî kabul etmez.
Binaen aleyh akar-ı meşfu‘un bir mikdarını terk ile diğer bir mikdarını almağa şefi‘in hakkı yoktur.

1042 Madde — Şüfeadan bazısı hissesini bazısına hibe edemez ederse hakk-ı şuf‘asını iskat etmiş olur.

1043 Madde — Şefi‘lerden birisi hâkimin hükmünden mukaddem hakkını iskat eylese diğer şefi‘ akar-ı meşfu‘u tamamâ alabiliyor.
Ve eğer hâkimin hükmünden sonra şefi‘lerden birisi hakkını iskat eylese şefi‘-i diğer anın hakkını alamaz.

1044 Madde — Müşteri bina-i meşfu‘u boyanmak gibi malından bir şey ziyade eylese şefi‘i muhayyerdir dilerse terk eder dilerse binanın semenile beraber ol ziyadenin dahi kıymetini verip meşfu‘u alır.
Ve müşteri akar-ı meşfu‘ üzerine ebniye yapmış yahud ağaç gars etmiş ise şefi‘ muhayyer olup dilerse terk eder ve dilerse akar-ı meşfu‘un semenile beraber ebniyenin yahud eşcarın kıymetini verip meşfu‘u alır yohsa ebniye yahud eşcarı kal‘ etmek üzere müşteriye cebredemez.

Fî 25 Zi’l-ka‘de sene 1289
Ve fî Kânûn-ı Evvel sene 1288

(Fihrist)