28

Onuncu madde: Çavuşların mevcûdu ve hasta veyâhud me’mûriyetde bulunanları ve sâir her dürlü vukûâtı küll-i yevm bâ-jurnal her takımın komiseri cânibinden taraf-ı emânete bildirilir.

On birinci madde: Hizmetini terk etmek isteyenler memhûr istifânâme takdîmiyle resmen istihsâl-i ruhsat etmeğe mecburdurlar.

Fî selh-i Cemâziye'l-evvel sene 1289 ve fî 24 Temmuz sene 1288

( Şehremaneti behiyyesinde müstahdem komiser ve ser çavuşlarıyle çavuşların )
( mükellef oldukları vazîfe-i me’mûriyetleriyle sûret-i harekâtlarını )
( mübeyyin ta’lîmâtdır )

Birinci bend: Komiser efendiler beher hafta Pazar günleri ser komiser odasında ictimâ’ ederek ma’iyetlerinde bulunan ser çavuşlar ile çavuşların bir hafta zarfında gerek umûr-ı me’mûrelerince ve gerek husûsât-ı sâirece her ne gûne vukûât olur ise jurnal olunarak hey’et-i umûmiyeye irâe ile îcâbâtı o gün icrâ olunacakdır.

İkinci bend: Ba’zı ifâde zımnında çavuşların ser çavuşlara ve ser çavuşların dahi komiserlere mürâcaati îcâb etdikçe edîbâne resmen temennâ edüb oturmaksızın ayakda durdığı hâlde her ne ise ifâdesini beyân edecekdir ve bilâ ruhsat oturur ise hilâf-ı nizâm hareket etmiş olacağı cihetle bâ-jurnal bildirilerek îcâbına bakılacakdır.

Üçüncü bend: Ser çavuşlar ile çavuşlar me’mûr olduğu mahallerde edîbâne gezmeleri lâzım gelerek meselâ setresinin önü açık olmak ve sokakda sigara içmek ve me’mûriyeti iktizâ etdirmedikçe aslâ kimse ile lakırdı etmek ve gülmek ve kimseye şaka ve latîfe etmek gibi harekât-ı memnû’ada bulunmayacak ve nokta olarak ikâme olunan yerlerde sebât ederek oradan mürûr ve ubûr eden ümerâ-yı askeriye ve zabtiye zâbitânına selâma durub riâyete dikkat edecek.

( Me’mûr )