541

On Beşinci Madde
Tedaviye muhtaç olan hayvanatı baytarlar bilâ-istisna muayene ve tedavi edecek ve icab eden edviyeyi bulunduğu mahal eczahanesinde imal ettirecek ve eczahane bulunmadığı mahalde kendi idaresinde bulunacak edviye-i baytariyeden imal ve tertip ederek esman-ı asliyesine yüzde otuz zammıyla verilecektir.

On Altıncı Madde
Hastahanelerde cari olan usule tevfikan baytarlar tarafından tanzim olunacak defter mucibince esmanı beledi sandığından tediye olunmak üzere demirbaş bazı alât-ı cerrahiye teslim olunacak ve lüzumu miktar edviye-i baytariye dahi verilecektir.

On Yedinci Madde
Beher sene nihayetinde edviye-i baytariyeden ashab-ı iktidara verilen edviyenin esmanı bil-hesap beledi sandığına teslim olunacaktır. Hükûmet-i mahalliye emriyle fukaraya verilen ve salgın hastalık sebebiyle sarf ve istihlak olunan edviyenin miktarı dahi hükûmet-i mahalliyenin makbuz senetleriyle tatbik ve baki kalanın ve bir sene zarfında sarf olunanın yerine lüzumu olan edviyenin miktarını mübeyyin defteri tanzim edilerek hükûmet-i mahalliye vasıtasıyla Mekteb-i Tıbbiye-i Şahane Nezaret-i Behiyesine gönderilecektir.

On Sekizinci Madde
Baytar ve müfettişlerin tebeddülleri vukuunda yed-i emanetlerine tevdi olunan alât-ı cerrahiye ve edviye-i baytariyeyi yerlerine tayin olunan baytara veyahut müfettişe meclis-i beledi muvacehesinde defteriyle devr ve teslim edecektir. Ve yerine baytar veyahut müfettiş tayin olunmamış veyahut tayin olunan memur gelmemiş olduğu halde meclis-i belediye teslim ederek makbuz senedi alacaktır.

Fi 9 Zilhicce sene 292 ve fi 25 Kânun-ı Evvel sene 291