556

Yedinci Madde — Me'mûrîn ve ketebe ve hademeden resmen istifâ ile terk-i me'mûriyet ve hizmet ihtiyâr idenlerin hizmetde bulundukları müddetce virmiş oldukları mebâliğ sandûka kalacağı misillü kendülerinin ve eytâmının tekâüd maâşı istihkâkı sâkıt olacakdır. Müddet-i istihkâkiyeyi itmâm itmiş olanlardan altıncı maddenin gayrı olarak infisâl idenler veyâhûd devâir-i sâireye nakl eyleyenler olur ise o misillülere müstahak olduğu tekâüd maâşı tahsîs olunur ve bunlardan muahharan her ne sebeple olur ise olsun yine telgraf ve posta-hâne münâsib bir işde istihdâm idilenlerin ikinci girdikleri târîhden i'tibâren tekâüd maâşları tevkîf olunacak ve bi'l-âhire yine terk-i me'mûriyet idecek olurlar ise evvelce muhassas olan tekâüd maâşını alacaklardır.

Sekizinci Madde — Müddet-i istihkâkiyeyi itmâm idüb de nizâm-ı tekâüdü icrâ olundukdan sonra dîger bir hizmet ve me'mûriyet-i devletde bulunanların telgrafdan müstahak oldukları tekâüd maâşları hîç bir sebeb ve vesîle ile kat' ve tenzîl olunmayacakdır.

Dokuzuncu Madde — Lâ-akal on beş sene hizmet ve me'mûriyetde bulunub da tekâüde hîç bir mûcib ve istid'âsı olmadığı hâlde hasbe'l-îcâb me'mûriyetinden afv olunanlar dîger bir hizmete ta'yîn olununcaya değin mutlakâ nısf maâş ile tekâüd idilmiş salâhiyetini hâiz olarak ol vechile maâş tahsîs idilecekdir ve bu misillülerin eytâm ve erâmili dahi işbu nizâmnâmenin göstereceği hukûkdan kat'an sâkıt olmayacakdır.

Onuncu Madde — Beşinci madde mûcibince tekâüdleri icrâ olunanlara sened-i resmî virilmiş olan mütekâidînin hîç bir gûne muzâyaka ve zarûret çekmemeleri begâyet matlûb ve mültezem olduğundan mütekâidîn maâşâtı aslâ sekte ve ilişige uğratılmayarak ashâbı taraflarından her ay başlarında me'mûrîn-i müstahdeme maâşından mukaddem havâle olunan mahalden evvel be-evvel i'tâ ve teslîm olunacakdır.

Fasl-ı Sânî

( Me'mûrîn ve hademenin eytâm ve erâmiline tahsîs olunacak )
( maâşlara dâirdir )

On Birinci Madde — Me'mûrîn ve ketebe ve hademeden irtihâli vukû' bulanların terk (idecekleri)