564

Yedinci madde İşbu zevâtın kimine ziyâde ve kimine az re'y isâbet itdiğine
bakılmayub cümlesi müsâviyen kâbil-i intihâb add olunarak huzûr-ı meclisde
esâmîsi bir deftere yazılub zîri kâimmakâm ve a'zây-ı meclis tarafından imzâ
kılınacakdır

Sekizinci madde Patrik olacak zât kilisaca reîs-i rûhânî oldığından
mâdde-i sâbıkada beyân olundığı vechle kâbil-i intihâb olanların yapılacak defteri
makâm-ı mutasarrıfîye gönderilecek ve işbu defterde muharrer zevâtın esâmîsi makâm-ı
mezkûrdan derhâl tahrîrât veyâ telgraf ile Bâb-ı Âlî'ye arz ve iş'âr
olunacak ve şâyed bunlardan devletce istisnâ olunacakları olur ise Bâb-ı Âlî
cânib-i sâmîsinden bi't-tenkîh diğerleri beyninde intihâbın icrâ olunması zımnında
cevâben vukû' bulacak emr ü iş'âr makâm-ı mutasarrıfîden kâimmakâm ile sinodosa
bildirilecekdir

Dokuzuncu madde Mâdde-i sâbıkada beyân olundığı üzere Bâb-ı Âlî'nin emri
mutasarrıflık cânibinden teblîğ olundukda sinodos ile Kudüs manastırında bulınan
sâir arşimandritlerden ve brodosinceloslardan ve hâricden med'uvv olarak
gelmiş olan yerlü papaslar ile bunlar misillü nefs-i Kudüs ahâlî-i Hıristiyânî
tarafından müntehab bulınacak iki yerlü papasdan mürekkeb bir meclis-i umûmî akd
olunarak bermûceb-i emr usûl-i intihâbiyenin icrâsına mübâderet kılınacakdır
şöyle ki intihâba dâhil olan zevâtdan üç neferi kâffe-i huzzâr-ı meclisin ya'nî
gerek rehâbînin ve gerek med'uvv bulınan papasların hafiyyen i'tây-ı re'y itmesiyle
hâsıl olacak ekseriyyet-i ârâ ile nâmzed ta'yîn olunacak ve işbu üç nefer
nâmzedlerin ta'yîn olundukları akîbinde bunların isimlerini hâvî varakayı meclisin
a'zây-ı rehâbâniyesi bi'l-istishâb Kumâme kilisasına varub a'zây-ı sâire dahi
kilisada hâzır oldukları hâlde ötedenberü icrâsı mu'tâd olan rüsûm
âyîniyeye tevfîkan mezkûr üç nefer nâmzedlerin biri patrik olmak üzere
sinodos hey'et-i rûhâniyesi tarafından re'y-i hafî ve ekseriyyet-i ârâ ile intihâb
olunacak kilisaca rüsûm-ı mezhebiyye icrâ olunacak ve tesâvî-i ârâ vukû'unda
kâimmakâmın inzimâm-ı re'yiyle keyfiyyete netîce verilecekdir

( Onuncu )