72

72

Meselâ bir değirmen taksim olunsa artık değirmen olarak isti'mâl olunamaz.
Bu cihetle menfaat-i maksûde fevt olur.
Binâenaleyh müşâriklerinden yalnız birinin talebi üzerine hâkim ânı taksim edemez.
Ammâ bittarâzı taksim olunur.
Hammâm ve kuyu ve kanavât ve küçük oda ve iki hâne arasında ki hâit dahi
böyledir.
Bir hayvan ile bir araba ve bir eyer ve bir cübbe ve bir yüzük taşı gibi yarmağa
ve kırmağa muhtâc olan urûz dahi bu kabîldendir ki hiç birinde kısmet-i kazâ
cârî olmaz.

1142 Madde — Bir müşterek kitâbın taksim-i evrâkı câiz olmadığı gibi müteaddid
cildlere münkasım olan bir kitâbın cild becild taksimi dahi câiz olmaz.

1143 Madde — İki yâhud ziyâde kimseler beyninde müşterek olub da başkasının
aslâ duhûle hakkı olmayan tarîkın biri kısmetini isteyib de diğeri imtinâ'
etdiği takdîrde nazar olunur.
Eğer ba'delkısme her birine bir tarîk kalacak olur ise taksim olunur.
Ve illâ kısmete cebr olunmaz.
Meğer ki her birinin başka başka tarîk ve menfezi ola.
Ol hâlde yine taksim olunur.

1144 Madde — Mesîl-i müşterek dahi tarîk-i müşterek gibidir ki biri kısmet isteyib de
diğeri imtinâ' etdiği takdîrde eğer ba'delkısme her birine suyunu akıdacak
kadar yer kalırsa yâhud mesîl ittihâz edecek başka yeri var ise taksim
olunur ve illâ taksim olunmaz.

1145 Madde — Bir kimse hakk-ı mürûru bâkî olmak üzere mülkü olan tarîk
satabildiği gibi iki kişi beyninde müşterek olan bir akârın taksiminde tarîk-i
müşterekin rakbesi ya'nî mülkiyeti yerinde kalmak ve diğerinin yalnız hakk-ı mürûru
olmak üzere kısmet dahi câiz olur.

1146 Madde — Bir hânenin taksiminde iki hisse arasında ki hâit hissedârlar
beyninde müşterek olarak bırakılmak câiz olduğu gibi yalnız birinin mülkü olmak
üzere kısmet dahi câiz olur.

( Fasl-ı Hâmis )