74

şart ve hıyâr-ı rü'yet ve hıyâr-ı ayb vardır
meselâ hissedarlardan biri şu kadar kile buğday ve aña mukâbil diğeri bu kadar
kile arpa yâhud biri şu kadar koyun ve aña mukâbil diğeri bu kadar inek almak üzere
mâl-ı müştereki bi't-terâzî beynlerinde taksîm itdiklerinde eger birisi şu kadar gün
muhayyer olmak üzere şart itmiş olsa ol müddet zarfında dilerse kısmeti
kabûl ve dilerse fesh eder ve eger birisi henüz mâl-ı maksûmu görmemiş ise
gördükde kezâlik muhayyer olur ve eger birisinin hissesi ayıblı çıksa dilerse
kabûl ve dilerse redd eyler

1154 madde müttehidü'l-cins olan kıyemiyyâtın taksîminde dahi hıyâr-ı şart
ve rü'yet ve ayb vardır
meselâ müşterek olan yüz koyun sâhibleri beyninde hisselerine göre taksîm
olundukda eger birisi şu kadar gün muhayyer olmak üzere şart itmiş olsa
ol müddet zarfında kısmeti kabûl idüb itmemekde muhayyer olur
ve eger henüz koyunları görmemiş ise gördükde kezâlik muhayyer olur
ve eger birisinin hissesine isâbet iden koyunların ayb-ı kadîmi zuhûr itse
kezâlik muhayyer olub dilerse kabûl ve dilerse redd eyler

1155 madde müttehidü'l-cins olan misliyyâtın taksîminde hıyâr-ı şart ve rü'yet
olmayub fakat hıyâr-ı ayb vardır
meselâ iki kişi beyninde müşterek olan bir yığın buğday taksîm olundukda şu kadar
gün muhayyer olmak şartı mu'teber olmaz
ve biri buğdayı görmemiş ise gördükde muhayyer olmaz
ammâ birine yığının üst tarafından ve diğerine alt tarafından virilüb de
alt tarafı çürük çıksa sâhibi muhayyer olub dilerse kabûl ve dilerse
redd eyler

* Fasl-ı Sâbi' *
(kısmetin fesh ve ikâlesi beyânındadır)

1156 madde kur'alar kâmilen çekildikde kısmet temâm olur
1157 madde kısmet temâm oldukda artık andan rücû' olunamaz
1158 madde esnâ-yı kısmetde meselâ kur'aların çoğu çıkub da yalnız biri
(kalmış)