77

Ya'nî bir müşterek hânede dîger kimesnenin hakk-ı mesîli olsa ol hâne sâhibleri hâneyi taksîm edip mesîli hâli üzere terk ederler.

1169 Madde - Bir konağın havlusunda dîger kimesnenin menzili olup da menzil sâhibi ol havludan mürûr eder olduğu hâlde konak sâhibleri konağı taksîm edecek olduklarında menzil sâhibi mâni' olamaz. Fakat anlar konağı taksîm ettiklerinde menzilin kapısı arzında ona bir yol terk ederler.

1170 Madde - İkiye taksîm olunan bir konağın iki kısmı arasında bir hâit olup da bir kısmın dîger hâitin üzerindeki kirişlerin uçları ol hâit-i müşterek üzerinde bulunduğu sûretde eğer hîn-i kısmetde ol kirişlerin ref'i şart edilmiş ise ref' olunur. Ve illâ ref' olunmaz.
İki kısım arasındaki hâit bir hissedârın ve uçları ol hâit üzerine bindirilmiş olan kirişler dîger hissedârın mülkü olmak üzere taksîm olunduğu sûretde dahi hüküm yine bu vechledir.

1171 Madde - Bir kısımda vâki' olan ağaçların dalları dîger kısmın üzerine sarkmış olduğu sûretde dahi eğer hîn-i kısmetde kat'ı şart edilmemiş ise ol dallar kestirilemez.

1172 Madde - Bir tarîk-i hâsda hakk-ı mürûru olan bir müşterek hâne taksîm olundukda hissedârlardan her biri ol tarîka kapı ve pencere açabilir. Sâir ashâb-ı tarîk ona mâni' olamaz.

1173 Madde - Kâbil-i kısmet olan bir mülk-i müşterekde hissedârlardan biri kendisiçün dîger hissedârın izni olmaksızın bir binâ yapdıkdan sonra dîger hissedâr kısmet taleb ettikde taksîm olunur.
Ol binâ bânîsinin hissesine isâbet ederse febihâ.
Ve eğer dîger hissedârın hissesine isâbet ederse bu hissedâr ol binâyı hedm ve ref' ettirebilir.