82
Ol hâlde men' olunabilür Nitekim fasl-ı sânîde tafsîl olunur
* Fasl-ı sânî *
( Muâmelât-ı civâriye hakkındadır )
1198 Madde Herkes kendi mülkü olan hâit üzerine dilediği
kadar çıkar ve istediği şeyi yapar zarar-ı fâhişi olmadıkça komşusu
mâni' olamaz.
1199 Madde Binâya zarar veren ya'ni binâya vehn getiren ve inhidâmına sebeb
olan yâhud havâyic-i asliyeyi ya'ni süknâ gibi binâdan maksûd olan menfe'at-ı
asliyeyi men' eden şeyler zarar-ı fâhiştir.
1200 Madde Zarar-ı fâhiş bi-eyyi vechin kân def' ettirilir.
Meselâ bir hânenin ittisâlinde demirci dükkânı yâhud değirmen yapılıp da demir
darbundan yâ değirmenin deverânından ol hânenin binâsına vehn gelmek yâhud
furun ihdâs ile tütünün kesretinden ve yâ bezirhâne ihdâs ile râyiha-i
kerîhesinden ol hânede oturulamayacak mertebe sâhibi müteezzî olmak
zarar-ı fâhiş olmağla bu zararlar bi-eyyi vechin kân def' ve izâle ettirilir.
Ve kezâ bir kimse diğerin hânesine muttasıl arsasında hark ihdâs ederek
değirmene su icrâ etmekle hânenin dîvârına vehn gelse yâhud bir kimse
komşusunun dîvârının dibini mezbele ittihâz ve süprüntü ilkâ etmekle dîvâr
çürüse dîvârın sâhibi zararını def' ettirir.
Kezâlik birinin hânesi kurbunda diğerin ihdâs eylediği harmanın tozu gelmekle
ol hânede durulamayacak mertebe sâhibi müteezzî olsa zararı def'
ettirilir.
Nitekim birinin harman yeri kurbunda diğeri bir mürtefi' binâ ihdâs ile harmanın
rüzgârını sed eylese zarar-ı fâhiş olmağla ref' ettirilir.
Kezâlik bir kimse bezzâzlar çarşısında aşçı dükkânı ihdâs edip de tütünü
komşusunun emti'asına isâbet ile zarar-ı fâhişi olsa def' ettirilir.
Ve kezâlik bir kimsenin hânesindeki kârîz yarılıp da komşusunun hânesine
cereyân etmekle zarar-ı fâhiş olsa komşusunun da'vâsı üzerine ol
kârîzin ta'mîr ve ıslâhı lâzım gelür.
( 1301 )