86

Fasl-ı Sâlis

( Tarîkler hakkındadır )

1213 Madde — Bir tarîkın iki tarafında hânesi olan kimse birinden dîgerine köprü inşâ edecek olsa men’ olunur. Ammâ inşâ etdikden sonra eger mârreye zararı yok ise hedm olunmaz. Fakat böyle tarîk-i âm üzerine yapılmış olan köprülerde ve şahnişinlerde hakk-ı karâr olmaz. Binâen-alâ-zâlik ber-vech-i bâlâ tarîk-i âm üzerine inşâ olunan köprü münhedim oldukdan sonra sâhibi binâ edecek olsa yine men’ olunabilir.

1214 Madde — Tarîk-i âm üzerinde alçak çıkıntılar ve şahnişinler gibi mârreye zarar-ı fâhişi olan şeyler kadîm olsa bile ref’ etdirilir. (7) maddeye bak.

1215 Madde — Bir kimse hânesini ta’mîr edecek oldukda mârreye zarar vermemek şartıyla tarîkın bir tarafında serîan çamur yapıp binâsına sarf edebilir.

1216 Madde — Ledü’l-hâce emr-i sultânî ile bir kimsenin mülkü kıymetiyle alınıp tarîka ilhâk olunabilir. Fakat te’diye-i semen olunmadıkça mülkü yedinden alınamaz. (251) ve (262) maddelere bak.

1217 Madde — Mârreye mazarratı olmadığı hâlde bir kimse tarîkın fazlası olan yerini semen-i misliyle cânib-i mîrîden alıp hânesine ilhâk edebilir.

1218 Madde — Tarîk-i âma kim olursa olsun müceddeden kapı açabilir.

1219 Madde — Tarîk-i hâsda hakk-ı mürûru olmayan kimse müceddeden kapı açamaz.

1220 Madde — Tarîk-i hâs onda hakk-ı mürûru olanların mülk-i müşterekleri gibidir. Binâen-aleyh tarîk-i hâs ashâbından birisi sâirinin izni olmadıkça gerek muzır olsun ve gerek olmasın ol tarîkda bir şey ihdâs edemez.

1221 Madde — Tarîk-i hâs ashâbından biri sâir ashâb-ı tarîkın izni olmadıkça müceddeden binâ eylediği hânesinin damlasını ol tarîka akıtamaz.

(1232)