87

1222 Madde Bir kimse tarîk-i hâsda olan kapusını sedd etmekle hakk-ı mürûru sâkıt olmaz.
Binâenaleyh sonra kendisi hânesini satsa müşterîsi tekrâr kapusını açabilir.

1223 Madde Tarîk-i âmmdan mürûr edenlerin kesret-i izdihâmdan nâşî tarîk-i hâsa duhûl etmeğe hakları vardır.
Binâenaleyh bir tarîk-i hâs ashâbı beynlerinde bi’l-ittifâk ol tarîk-i hâsı satamazlar.
Ve beynlerinde taksîm edemezler ve ağzını sedd eyleyemezler.

Fasl-ı Râbi‘
( Hakk-ı mürûr ve mecrâ ve mesîl beyânındadır )

1224 Madde Hakk-ı mürûrda ve hakk-ı mecrâda ve hakk-ı mesîlde kıdeme i‘tibâr olunur.
Ya‘nî bunlar kadîmden olageldiği vech üzere terk ve ibkâ olunurlar.
Zîrâ (6) madde hükmünce kadîm olan şey hâli üzere ibkâ olunur ve hilâfına delîl olmadıkça tağyîr olunmaz.
Ammâ şer‘a muhâlif olan kadîme i‘tibâr yoktur.
Ya‘nî fi’l-asl nâ-meşrû‘ olarak yapılmış olan şey kadîm olsa da ona i‘tibâr olunmayıp zarar-ı fâhişi var ise izâle olunur.
( 27 ) maddeye bak.
Meselâ bir hânenin çirk-âbı ez-kadîm tarîk-i âmma cârî olagelse ve mârreye zararı olsa kıdemine i‘tibâr olunmayıp zararı def‘ ettirilir.

1225 Madde Birinin arsasından dîğer kimsenin hakk-ı mürûru olduğu hâlde arsa sâhibi ânı mürûr ve ubûrdan men‘ edemez.

1226 Madde Mübîhin ibâhasından rücûa salâhiyeti vardır ve bir zarar izn ü rızâ ile lâzım olmaz.
Binâen alâ zâlik bir kimsenin dîğerin arsasından hakk-ı mürûru olmadığı hâlde